Viltu vera vinur minn

"Viltu vera vinur minn." -  Þessa beiðni leggja menn fram á feisbókinni í hundraðavís.  Í dag eru 300 milljónir manna skráðir á þessa ágætu feisbók víða um heim og nota hana mismikið, eins og gengur.  Flestir sem slíka sendingu fá þekkjast boðið.   Aðrir neita.  Þeir gera útstrikunina að sínum valkosti.  Með öðrum orðum.  Þeir vilja ekki verða feisbókar vinur einhvers.  Og hafa vitaskuld fullt leyfi til.  Ýmislegt er nú til.  Ekki verður annað sagt.  Lífið snýst um tölvuna, internentið og að vera í samskiptum við allt og alla helst út um allan heim og allra helst á nákvæmlega sama tíma.  Það er málið.  Feisbókin snýr á tímann.  Eða hvað?  Hvað fornmaður skildi geta gert sér það í hugarlund að menn gætu eignast feisbókarvini bara með því einu að kveikja á tölvunni sinni og fara svo inn á ákveðna síðu og senda þessa fyrrispurn:  "Viltu vera vinur minn."  Eða:  "Viltu vera memm? "  eins og krakkarnir segja þegar þeir banka hjá vinum sínum.  Og eru þá í raun að segja:  "Viltu leika við mig?"  Já, bræður og systur!  Við lifum einkennilega tíma þar sem allt er raunverulega hægt.  Tölvan hélt innreið sína í heim mannanna og breytti vitaskuld heilmiklu í daglegu lífi fólks.  Tölvan er þarfagripur og ótrúlega fjölhæf.  Með tölvunni er hægt að framkvæma ýmislegt sem áður þurfti mikinn tækjabúnað við en má nú gera inn í þessum turni sem hýsir vélbúnað tölvunnar.  Munum að Drottinn veit alveg um tilkomu tölvunnar.  Og hann vill að sitt fólk noti þessa leið til trúboðs.  Þarna opnast trúboðanum gríðarlega öflugur farvegur sem margir eru á.  Þarna staldra menn við.  Jesús er allstaðar þar sem maðurinn er.  Já, líka á fésbókinni.  En til þess að það sé mögulegt þarf fésbókarfólk að segja frá Jesús á síðunni.  Eins og ævinlega ber maðurinn sína ábyrgð að segja frá því sem hann trúir á til að aðrir megi hólpnir verða.  Sagt er að krakkar og ungmenni hangi á fésbókinni.  Eflaust er þetta rétt.  Eða að sumu leiti.  En sumir krakkar hafa bara alltaf haft þörf fyrir að hanga einhversstaðar.  Hvað um sjoppuhangsið hér áður fyrr?  Sjoppan var staðurinn sem sumir krakkar komu saman á.  Sjoppan var ekki góður uppeldisstaður en samt það sem sumir krakkar sóttust eftir að vera á helst öll kvöld í endalausum brandarkeppnum, kókþambi og hlátrum.  Má vera að sjoppuhangsið sé útdautt.  En eitt sinn var allgott líf í sjoppuhangsinu.  Nú er það feisbókin og aðrar álíka bækur á netinu sem ungir og gamlir "hanga" á.  Eins stundum er sagt.   Hangs er ekki heppilegt.  Sjoppuhangsið var það ekki heldur.  Hangs er ágæt ábending til manna um að eirðarleysi sé í gangi.  Hangs er eitt, að kíkja við annað. Munum það. En þrátt fyrir feisbókina og aðrar álíka "bækur" er Jesús raunveruleiki og hann vill finna þig.  Jesú hefur ekkert breytt sér.  Jesús lifir!  Hann lifir! Amen.

www.konni.is