Guð blessi Ísland

Nú eru alvörutímar.  Tónninn í ráðamönnum þjóðarinnar er þungur og ytri aðstæður okkar sem þjóðar er afar íþyngjandi.

Menn berja sér og barma.

Það er ekki að undra að ótti og kvíði sæki að fólki og jafnvel örvænting.  Þegar menn líta til þeirra sem eiga að veita leiðsögn og leiða fram lausn, kemur í ljós að menn hafa farið geitarhús að leita ullar.

Menn eiga ekki lausn.

Ég heyri gjarnan tal um skjótan bata og að land muni senn rísa. Þeir sem tala með slíkum hætti hafa ekki veruleikann með sér.  Ég er þeirrar skoðunar að þjóð okkar hafa ekki enn bitið úr nálinni.  Við munum enn sjá boða og bylgju brotna á okkur.

Hvað er til ráða?

Eina úrræðið sem við höfum er að snúa bökum saman og setja allt okkar traust á Guð.  Menn hafa í flimtingum að Geir Haarde þáverandi forsætisráðherra lauk afdrifaríkri ræðu í upphafi hruns með orðunum “Guð blessi Ísland”. 

Undarlegt að menn skuli gantast með þetta, þar sem þetta er trúlega það besta sem sagt hefur verið í allri þessari umræðu.

Við verðum að leita Guðs af öllu hjarta og elska Hann sem og náunga okkar.

Hér er formúlan:

Luk 10:27  Hann svaraði: "Elska skalt þú Drottin, Guð þinn, af öllu hjarta þínu, allri sálu þinni, öllum mætti þínum og öllum huga þínum, og náunga þinn eins og sjálfan þig."

Ef við leysum kraft kærleikans úr læðingi mun allt fara vel, en þessi barningur á hnefanum fer hvorki með okkur lönd eða strönd.


Guð blessi þig.

Gunnar Þorsteinsson.

Tekið af heimasíðu Krossins www.krossinn.is